Blessings an respek to all a mi Tambareen Fambily an mi Mix Up an Blenda massive. An propa respek to all Ragashanti in di Mawnin listeners. Big up unu stay right self. As usual, we nuh inna di one bag a hitching ting - straight to di mix-up dem.

Peeps, di mix-up dem up ya inna Obama Lan tun up till dem buck. But da one ya weh mi a goh bax unu down wid come fram Canada.

One 60-odd-year-old man live wid him wife up deh inna Canada. Di wife have a niece weh did end up inna drama wid fi har husband. Di niece an har husband eventually lef one anneda, but di court gi di niece husband dem pickney, gi him dem house and a him get most a di money.

Di aunty, who is di wife of di 60-odd-year-old man, staat give it to fi har dawta dem, a tell dem say dem betta mek sure say dem nuh gwaan like eediat like har niece an goh mek dem man end up wid wa di niece husband get. Pon di regula, she nuh stop doe di niece say she a eediat.

Anyways, di aunty husband is a man weh mek him regular travels back an forth to Jamaica. One time him fahwud fram Jamaica an staat diss up him wife, who, of course, is di niece's aunty. Di man staat tell him wife how she pap dung an how nuttin naa gwaan fi har sort-out cause she jus lay dung deh an him haffi a ride har like donkey!! Maaaawwdd!! People unu see di breed a libaty weh di man a buss pon him wife?!

kotch it

Di man all staat hype pon him wife how she boring, an him all staat rinse bare young people choon. One a him favourite was Vybz Kartel's Summer Time. Him jus did a hype an a gwaan wid a bag a tings an jus a diss up him wife.

Wa did really a gwaan was dat di 60-odd-year-old husband did link up wid a goodas youngas a Jamaica. Di youngas did a dash it out pon him wicked! She kotch it, an quint it, an mash up him head di most way. Di husband all end up a breed di youngas. Di husband did love it so much dat a bare Viagara him staat rinse fi keep up wid di youngas wen she a fling on di ting pon him inna style an fashion. Eventually, him goh tek too much a di Viagara an it pitch him an kill him. Yeah, di Viagara done him an him drop dead.

joint account

Afta di wife deal wid di reality a him death, she staat organise certain papers an certain affairs. A soh she notice say har joint account wid har husband did gaan down to nuttin. Wen she investigate, she realise say har husband did buy house a Jamaica fi di goodas youngas an a sen all a dem money goh Jamaica. Soh di wife fly dung a Jamaica quick-quick fi tek ova him account, di house an him jewellery.

Wen she reach di house she see say a di youngas a run tings. She mek di youngas know she come fi claim house, account, an jewellery. But di youngas a real bad gyal an jus mek di wife know say she nuh have nuttin fi get. Di youngas all staat style har an a tell har say since she want jewellery she have a gift fi har. A deh soh di youngas goh eena di house an come out wid a plastic ring an gi di wife. A plastic ring!!! Noooooo sah!!! A bare badness di youngas rinse pon di wife an a talk up a bag a tings. Crazy excitement!! Di wife get bummy an shame an decide fi cut an goh back a Canada wid nuttin.

relationship done

An jus' like dat, di same wife weh did a tell har dawta dem say dem nuh fi tun eena eediat like har niece, an goh deh wid man, an nuh get nuttin wen relationship done - a di same wife weh find har self shame an embarrassed inna di same situation.

Dats why people fi careful how dem quick fi judge others wen dem a goh through dem crasses cause yuh neva really know if a similar ting might reach yuh.

Bless up, an tek cyere a unu self. See unu Thursday same place ya soh.

'Wa did really a gwaan was dat di 60-odd-year-old husband did link up wid a goodas youngas a Jamaica. Di youngas did a dash it out pon him wicked! She kotch it an quint it an mash up him head di most way.'