Tambareeeeeeeennnnn!!!! Woooiieee!!! Wa a gwaan peeps. Big up unu good-good self. Bless up all a mi Tambourine Fambily linky-linky an all a mi Mix-up family!!! An straight blessings to all a mi Ragashanti Live listeners ova www.tambourineradio.com

Mix-up one pop!

People, mi live a Obama Lan now, but mi still get di good mix-up dem fram Jamaica. An see mi get two ya bout some man who a get some propa bun unda dem nastiniss! Lawd Jeezas!

Wid regards to di second mix-up ... a long time nuff a unu man a gwaan wid dem tings ya a Jamaica. An unu need fi stop it. A say stop it!! Pupa Jeezas if yuh nuh busy ...

Man Get A Beating

Raga, this mawnin in di middle a one sweet dream mi start hear one piece a bangarang and noise. Loud cussing ... glass a bruk ... furniture a tun ova and bare tings. Nuh mi neighbour dem a fight. Middle-aged couple ... and di woman a beat out di living daylights out a di man.

Di woman sister dem from further down di road come up and couldn't get ina di house so dem call police. All this time a pure bawlin caz di man a get some bitch lick sound like when yu a knock dust out a piece a carpet. Is a strong body woman dat weigh bout 250lb and di man tall and skinny and weigh bout 150lb.

In di long run, di woman seh she come een before day this mawnin from work and drop asleep ... only fi wake up and find di man stand up ova her wid her Samsung Galaxy phone hold up close to her face. Raga, di woman have face lock pan her phone and di man a try get in fi check di phone ... an a dat she jump up out a her sleep and see. She seh it look like chuu her eyes close di phone wouldn't unlock. Either that or him couldn't centre her face inside di likkle screen for di phone to read it so it will unlock.

She get up and ask him what him a do and him tell her dat him tek up di phone and did a stretch ova her fi put it back on di bedside table.

She nuh believe him and start send on some lick to di man body wid a piece a 2x4 board.

She let in di sister dem an di three a dem start work pan him body ... Raga, di man bawl till him get eena temper.

She eventually unlock di phone and give him Raga, and tell him seh: "Sissy bwoy, tek di phone and check fi anything yu want ... jus mek sure when yu done yu pack up yu things and leave."

Bout 8:30 before mi leave out fi go work mi see him a walk go bus stop wid two big garbage bag full a clothes ... him face and neck well bruise up and all now nuh police nuh come.

A Check Har Underwear

So, Raga, dis woman a Clarendon notice say wen she come home an pudung har underwear, wen she goh back fi dem fi wash dem sometimes dem inna different positions. So she get suspicious an start look out. Only fi one day ketch har man a smell dem! She did tink a some freaky ting him into an staat cuss him an a beat him wid di panty dem. But den di man bawl out say a true she a bun him an him did jus a check fi find proof. Di woman get bex more an start beat him fi di betta an all stuff some a di panty dem inna him mout an tell him say a dat him fi get cause a mussi nyam him waan nyam dem. lol

—

'Tambareen fi Life!!'