Latty Goodaz back inna do place again! Me did fly out fi the summer because me visa up like seven, me nuh lock out a farin like some artiste. Me ready fi give unuh all the drama now.

Back-to-school time yah now, so me hope all the parents dem ready. Me know life hard, but if you did go Dream Weekend and Trinidad Carnival and the other bashment party, you must can find unuh school fee and book money. Nuff a unuh parents love hype inna party wid champagne bokkle and bere tings and unuh baby nuh have no school bag. Unuh fi stop it! As Darrio say, "School Fee nuffi floss inna dance."

Gaza Slim knife weh stick sheep a stick goat

Dem call it scam, we call it reparation ... Gaza Slim, you memba when you do di song wid World Boss?? Now you management team a say people a scam you. Look how the same knife weh stick sheep a stick goat. Me hear say you a hype pon Instagram a behave like you never know bout the story weh management a send in. It look like you and you management team need fi ENG UP!!

Gaza Slim, while me deh pon you name? Wha kinda mix- up this bout you and Tiana a war over Kranium? Di two a unuh need fi go find a song and stop the foolishness. As a matter of fact, the three a unuh need fi go find a song 'cause from Kranium sing bout Nobody Haffi Know, me nuh really hear no other big tune from him.

Spice big up yuhself

Spice, Miss Needle Eye, Miss So Mi Like It, big up yuhself. Me glad you apologise bout the likkle ting weh gwaan wid the likkle boy a wine pon the big woman during you set. It did look a way when me see it, but me glad you make a statement and ting. We need fi stop make dem pickney ya act like adults. Dem fi enjoy dem childhood.

Munga remember to thank Jah

If I ever forget to give thanks, Jah, please remind me ... Munga, me glad say you all right and recuperating from the likkle incident the other day. Me a pray fi you speedy recovery because who God bless, no man curse.