Happy belated Mother's Day to all worthy mothers, those biologically gifted and those who've been a gift in the lives of children.

Respect to the fathers who mother their children because contrary to popular belief, a no every man a dutty man or a deadbeat dad. Some have taken up where nuff 'mumma' left off. Dem plait hair, counsel, cook, wash an mek sure seh dem yute alrite. Dem no abuse dem and mek sure no odda woman no tek no step wid dem pickney neither

When me see how some woman work hard and sacrifice fi send dem pickney go school, clothes dem, feed dem and shelter dem and dem same one tun roun no have no manners to dem parents, it grieve mi heart. We all know seh mama can get miserable sumtimes, and get unda we skin, but at the end a di day a mama dat! All when her words a bun like country peppa we jus' haffi bite we lip and hol' it. Most mothers just want wat is best for their child.

Yuh have some people ungrateful to dem modda to di point weh it scandalous! After all the time and effort weh di woman put in and now dem alrite dem turn dem back pon her. Nuff inna dance, live inna big house, drive the most expensive vehicle, floss here, there and everywhere yet dem modda hungry and no live no weh! Dat no look good! All moddas day gone dem not even pick a hibiscus fi dem modda and dat free! Some people need fi do betta because even though the world know seh it takes cash to care nothing beat something from the heart.

Mi need women fi understand seh being a mother is a role that has to be taken seriously as you are responsible for shaping and moulding young lives and minds. That which you put in, a dat yuh a go get out and anyhow di pickney dem start get lef up carelessly we can kiss the stability of our sweet Jamaica goodbye because when we start ramp wid di kids we a ramp wid we future.

Some mothers naa get the love and di respect dem deserve because dem neva deh deh fi dem baby like they should, and lef dem up to di mercy a di world an stranger and mek all kinda evil tings reach dem. Nuff people a walk round wid all kinda emotional and psychological scars because a careless parents.

Nuff jump inna motherhood fi di wrong reason. A no everybody born wid dah maternal instinct sumting deh which is of paramount importance to raise a child. Is better a woman know seh a no my ting dat an lef it dan run in and di pickney suffer at the end of the day. If more people did a pree dem ting deh we wouldn't have so many homeless, hungry belly pickney pon di road an all bout. A woman no need fi push out a child fi be able to positively and meaningfully impact the life of a child. Some people will tell yuh is a stepmother or a stranger dem know as 'Mommy'.

Primary socialisation and the lessons taught are very important. Dem yah nowadays pickney bright like morning star and know everyting and understand wat a gwaan from dem come outta belly! Di woman dem need fi grow dem son to become responsible men and dem daughter fi be independent women. Stop inculcate inna dem mind fi find a rich man fi mind dem, tell dem mek sure dem have dem own. Boy cyaa siddung an naa help wid housework and no respect him sister because lazy bwoy tun dutty man!

Motherhood and parenting are blessings which take a lot a patience and time. Sumting weh me a look forward to but until then I'll be a mommy in training and by association and gwaan wuk pon it! Lalalalalalalala!